• Yaratildi: 29.03.2022
• Yangilandi: 06.09.2022
• O'qildi: 2456

Mediaforum ishtirokchilari “NKMK” AJ bo‘linmalarida bo‘lishdi

“NKMK” AJ, O‘zbekiston Jurnalistlari ijodiy uyushmasi hamkorligida tashkil etilgan “Milliy jurnalistika: anʼanalar davomiyligi va zamonaviylik” mavzusidagi respublika mediaforumining 4-kunida tadbir ishtirokchilari uchun Markaziy kon boshqarmasidagi 7-gidrometallurgiya zavodi va “Muruntov” koniga press-turlar o‘tkazildi.

Press-turlar davomida OAV vakillari va jurnalistlar zamonaviy texnologiyalarga asoslangan 7-gidrometallurgiya zavodi hamda “Muruntov” konida maʼdan qazib olish hajmini oshirish bo‘yicha olib borilayotgan keng ko‘lamli ishlar bilan yaqindin tanishishdi.

Jumladan, 2021-yilda ishga tushirilgan 7-gidrometallurgiya zavodi – texnogen chiqindilarni qayta ishlaydigan dunyodagi eng yirik korxona. Zamonaviy texnologiyalarga asoslangan 7-GMZda murakkab jarayonlar orqali qayta ishlangan (texnogen) maʼdanlardan mahsulot olish yo‘lga qo‘yildi. Zavodning kombinatning boshqa gidrometallurgiya zavodlaridan farqi shundaki, bu yerda qo‘llanilayotgan texnologiyalar evaziga qayta ishlangan maʼdanni yana qayta ishlab, mahsulot olish imkoniyati mavjud. Zavod yiliga 15 mln tonna texnogen chiqindilarni qayta ishlash quvvatiga ega.

Bugungi kunda “Muruntov” konining uzunligi 4,3 kilometr, kengligi 3,2 kilometr, chuqurligi 650 metrni tashkil etadi. Kondan yiliga o‘rtacha 42 million tonnadan ortiq maʼdan qazib olinmoqda. “Muruntov” koni geologlar tomonidan eng yirik oltin zaxirasiga ega kon sifatida eʼtirof etilib, uning zaxirasi 4,5 ming tonnadan ortiq baholangan. Konni o‘zlashtirishning V navbati kelgusida kon chuqurligini 1050 metrgacha yetkazish va maʼdan qazib olish hajmini yiliga 50 mln tonnaga yetkazish imkonini beradi.

OAV vakillari va jurnalistlarning savollariga Markaziy kon boshqarmasi, zavod va kon rahbar va mutaxassislari tomonidan atroflicha javoblar berildi.

“NKMK” AJ matbuot xizmati.