O‘zbekiston Respublikasi Iqtisodiyot va moliya vazirligi hamda “UzAssets” AJ hamkorligida “Davlat ishtirokidagi yirik korxonalarda sun’iy intellekt asosidagi samarali yechimlarni joriy etish” mavzusida anjuman bo‘lib o‘tdi. Tadbirda davlat ishtirokidagi yirik korxonalarning raqamli transformatsiya va sun’iy intellekt texnologiyalarini rivojlantirish uchun mas’ul mutaxassislar, mahalliy va xorijiy texnologik kompaniyalar vakillari ishtirok etdi.

Anjumanda yirik korxonalarning operatsion samaradorligini oshirish, biznes jarayonlarini avtomatlashtirish, boshqaruv tizimlarini takomillashtirish hamda zamonaviy texnologiyalardan samarali foydalanish masalalari muhokama qilindi.

Tadbir doirasida “Navoiy kon-metallurgiya kombinati” AJ vakillari korxonada raqamli yechimlarni joriy etish, ishlab chiqarish va boshqaruv jarayonlarini takomillashtirish hamda sun’iy intellekt texnologiyalaridan foydalanish bo‘yicha amalga oshirilayotgan ishlar va amaliy natijalar bilan o‘rtoqlashdi.

Anjumanda “NKMK” AJ Axborot texnologiyalari va raqamlashtirish bo‘yicha direktor B.Davlatov hamda AKT boshqarmasi boshlig‘ining sun’iy intellektni rivojlantirish bo‘yicha o‘rinbosari M.Hasanovlar ma’ruzalari bilan ishtirok etishdi. Ma’ruzalarda kombinatda raqamli transformatsiyaning ustuvor yo‘nalishlari, sun’iy intellekt texnologiyalarini ishlab chiqarish va boshqaruv jarayonlariga joriy etish yondashuvlari hamda ushbu yo‘nalishda amalga oshirilayotgan amaliy loyihalar haqida ma’lumot berildi.

Shuningdek, tadbirda Iqtisodiyot va moliya vazirligi hamda “UzAssets” AJ tomonidan ishlab chiqilgan Yagona transformatsiya platformasi taqdim etildi. Mazkur platforma raqamli tashabbuslarni tizimli amalga oshirish va zamonaviy texnologik yechimlarni yirik korxonalar faoliyatiga joriy etishga qaratilgan.

Navoiy kon-metallurgiya kombinati raqamli transformatsiya jarayonlarini izchil davom ettirib, ishlab chiqarish va boshqaruv samaradorligini oshirish, sun’iy intellekt va zamonaviy texnologiyalarni keng joriy etish hamda korxonaning texnologik salohiyatini rivojlantirishga qaratilgan loyihalarni amalga oshirmoqda.

“NKMK” AJ Matbuot xizmati