ОБРАЩЕНИЕ Председателя правления – Генерального директора

“Navoiy kon-metallurgiya kombinati” aksiyadorlik jamiyati

Boshqaruvi raisi – Bosh direktori Quvondiq Sanaqulovning korxona jamoasiga

M U R O J A A T I

Aziz hamkasblar!

Yangi O‘zbekiston va qadrdon kombinatimiz kelajagi, shuningdek, ulug‘ ajdodlarimiz beshik bo‘lgan muqaddas yurt taqdiri hamda farzandlarimiz va nabiralarimizning ertangi kuni bilan bevosita bog‘liq bo‘lgan muhim masala – korrupsiyaga qarshi murosasiz kurashish bo‘yicha sizlarga murojaat qilmoqchiman!

Inson zoti borki, qalbida kindik qoni to‘kilgan zaminni, Vatan deb atalmish muqaddas makonni obod qilish, xalqini baxtli va farovon ko‘rishdek ezgu orzu va intilishlar bilan yashaydi.

Shu ma’noda, murojaatimda ilgari surayotgan o‘ta dolzarb hamda mas’uliyatli masalalar sizlarni ham befarq qoldirmaydi, deb o‘ylayman. Aksincha, qalbingizda aks-sado berib, umumiy maqsadlarimiz mushtarak ekanini yanada teran anglashga xizmat qilishiga ishonaman. Barchamiz birlashib, hamjihatlik va mas’uliyat bilan harakat qilsak, oldimizda turgan vazifalarni, albatta, amalga oshiramiz.

Bugun mamlakatimizda Yangi uyg‘onish - Uchinchi Renessans poydevori barpo etilmoqda. Yangi O‘zbekistonda amalga oshirilayotgan siyosiy, iqtisodiy va ijtimoiy islohotlar, keng ko‘lamli yangilanishlar hamda o‘zgarishlar jahon hamjamiyati va xalqaro ekspertlar tomonidan yuksak baholanmoqda.

Jamiyatimizda kechayotgan demokratik yangilanishlar, inson qadrini yuksaltirish, fuqarolarning dard-u tashvishlarini hal etish hamda ularning farovon turmushini ta’minlashga qaratilgan iqtisodiy islohotlar o‘zining ijobiy natijalarini bermoqda. Bu o‘zgarishlar xalqimiz hayotida yaqqol namoyon bo‘lmoqda.

Bugun biz jahonning rivojlangan davlatlari qatorida munosib o‘rin egallashni maqsad qilgan Yangi O‘zbekistonda yashamoqdamiz. Bu maqsadga erishish yo‘lida mamlakatimiz taraqqiy etgan davlatlar bilan teng huquqlilik va o‘zaro manfaatdorlik tamoyillari asosida diplomatik, iqtisodiy va madaniy hamkorlik aloqalarini samarali rivojlantirmoqda.

Davlatimiz rahbari tomonidan Yangi O‘zbekistonni barpo etish va jamiyat hayotini tubdan yangilash maqsadida, ilgari surilgan yangicha fikrlash, yangicha ishlash va yangicha yashash g‘oyasi bugungi kunning muhim hayotiy talabi hisoblanadi. Zero, jadal sur’atlar bilan o‘zgarib borayotgan hozirgi zamonda o‘n yil, besh yil yoki hatto bir yil avvalgi qarash va yondashuvlar bilan yashab bo‘lmaydi. Davr har bir sohada zamonaviy tafakkur, yuksak mas’uliyat, tashabbuskorlik, ochiqlik va shaffoflik tamoyillari asosida faoliyat yuritishni talab etmoqda.

So‘nggi paytlarda jamiyat hayotining barcha sohalarida korrupsiyaga qarshi kurashish borasida katta sa’y-harakatlar amalga oshirilmoqda. Bu borada qonunchilik bazasi takomillashtirilib, davlat organlari va tashkilotlari faoliyatida ochiqlik hamda shaffoflikni ta’minlashga qaratilgan samarali mexanizmlar joriy etilmoqda. Ayniqsa, davlat xizmatlarini raqamlashtirish, jamoatchilik nazoratini kuchaytirish va fuqarolarning huquqiy ongini yuksaltirish korrupsiyaviy holatlarning oldini olishda muhim ahamiyat kasb etmoqda.

Korrupsiyaga qarshi kurashish faqat davlat organlarining vazifasi bo‘lib qolmasdan, balki har bir fuqaroning fuqarolik burchiga aylanishi zarur. Zero, jamiyatda halollik, adolat va qonun ustuvorligi tamoyillari qaror topmas ekan, barqaror taraqqiyotga erishish mushkul. Shu bois, har bir rahbar va xodim o‘z faoliyatida halollik, mas’uliyat va vijdonlilik mezonlariga qat’iy amal qilishi lozim.

Muhtaram Prezidentimiz Shavkat Mirziyoyevning 2025-yil 26-dekabrda Oliy Majlis va O‘zbekiston xalqiga qilgan Murojaatnomasida korrupsiya masalasiga alohida e’tibor qaratildi. Davlatimiz rahbari korrupsiyani davlat taraqqiyotiga to‘siq bo‘ladigan, adolat va qonun ustuvorligini izdan chiqaradigan hamda jamiyatda ishonch muhitini zaiflashtiradigan eng jiddiy tahdid sifatida ta’kidlab o‘tdi.

Shuningdek, korrupsiyaga yo‘l qo‘yish islohotlarga xiyonat ekanligini ta’kidlab, 2026-yilni korrupsiyaga qarshi kurashish bo‘yicha “favqulodda holat” yili, deb e’lon qildi. Bu esa korrupsiyaga qarshi kurashish mamlakat taraqqiyoti, iqtisodiy o‘sish va aholi farovonligini ta’minlashning eng muhim shartlaridan biri ekanligini yana bir bor namoyon etdi. Bu borada jadal rivojlanish yo‘liga kirgan va katta yutuqlarga erishgan davlatlar tajribasi ham korrupsiyaga qarshi murosasiz kurash iqtisodiy taraqqiyotning muhim omili ekanligini ko‘rsatadi.

O‘zbekistonda korrupsiyaga qarshi kurashish sohasida amalga oshirilayotgan davlat siyosatida korrupsiyaning oldini olish va uning profilaktikasiga alohida e’tibor qaratilmoqda. Ana shu vazifalarni samarali amalga oshirish va tizimli muvofiqlashtirish maqsadida, kombinatimizda Komplayens xizmati tashkil etilgan.

Bizning asosiy maqsadimiz – qimmatbaho metallar ishlab chiqarish hajmini oshirish bilan bir qatorda, xodimlarda korrupsiyaga qarshi huquqiy ong va madaniyatni yuksaltirish, korrupsiyaning har qanday ko‘rinishiga nisbatan murosasiz munosabatni shakllantirishdan iboratdir. Kombinat tizimida korrupsiyaga qarshi qaratilgan barcha fuqarolik tashabbuslarini qo‘llab-quvvatlaymiz va ularni ijobiy baholaymiz.

Har birimiz muammolarni hal etishni, avvalo, o‘zimizdan boshlashimiz lozimligini chuqur anglab yetishimiz zarur. Faqat shundagina mazkur yo‘nalishda olib borilayotgan ishlar kutilgan samarani beradi. Korrupsiyaga oid huquqbuzarliklarning oldini o‘z vaqtida olish, ularni aniqlash va chek qo‘yish jamiyat taraqqiyoti ijtimoiy adolat tamoyillarini ta’minlashning muhim sharti hisoblanadi.

Kombinatimiz ishchi va xizmatchilari, muhandis-texnik xodimlari!

Kombinatimizda zamonaviy boshqaruv tizimini joriy etish jarayonida barcha bo‘g‘inlarda korrupsiyaning har qanday ko‘rinishiga qarshi qat’iy va murosasiz kurash olib borilayotganini alohida ta’kidlab o‘tmoqchiman!

Bugungi kunda korxona rahbarlari va mutaxassislari iqtisodiy samaradorlikni ta’minlash, mablag‘larning maqsadli va oqilona sarflanishi, shuningdek, ochiqlik va shaffoflik tamoyillariga qat’iy rioya etish uchun shaxsan mas’ul ekanliklarini chuqur anglab yetishlari zarur.

Xorijiy hamkorlar bilan o‘zaro manfaatli munosabatlarni mustahkamlash, kombinatimizning xalqaro nufuzi va obro‘sini yanada yuksaltirish ham bizdan halollik va mas’uliyatni talab etadi.

Korrupsiyaga qarshi samarali kurashish uchun, avvalo, kombinatda ushbu illatga nisbatan murosasiz munosabatni shakllantirish lozim. Buning uchun har bir xodim o‘z huquq va majburiyatlarini yaxshi bilishi, ularga qat’iy amal qilishi va boshqalardan ham shuni talab qilishi muhimdir.

Korrupsiyaviy holatlarga oid taklif, ariza yoki shikoyatlarga ega bo‘lgan hamkasblarimizni befarq bo‘lmasdan kombinatning (79) 227-72-22 raqamli “Ishonch telefoni” yoki bizga yozma murojaat yo‘llash orqali o‘zining faol fuqarolik pozitsiyasini namoyon etishga chaqiramiz!

Biz har bir murojaatni belgilangan tartibda xolisona ko‘rib chiqilishini ta’minlaymiz. Korrupsiyaviy huquqbuzarlik holatlari o‘z tasdig‘ini topgan taqdirda, aybdor shaxslarga nisbatan amaldagi qonunchilikka muvofiq tegishli choralar ko‘riladi.

Qadrli jamoa!

Barchangizni yuksak mas’uliyat bilan yondashishga, jamoat hayotida faol ishtirok etishga va korrupsiyaga qarshi kurashda birlashishga chaqiramiz!

Faqatgina birgalikdagi sa’y-harakatlarimiz orqali halollik, adolat va shaffoflik muhitini qaror toptirishimiz mumkin.