• Yaratildi: 17.06.2022
• Yangilandi: 06.09.2022
• O'qildi: 1101

OAV vakillari va jurnalistlar 3-gidrometallurgiya zavodida

Bugun, OAV vakillari va jurnalistlar uchun o‘tkazilgan press-tur davom etdi. Press-turning 2-kunida ishtirokchilar “NKMK” AJ Shimoliy kon boshqarmasining 3-gidrometallurgiya zavodida bo'lishdi.

3-GMZda OAV vakillari va jurnalistlar ishlab chiqarish jarayonlari va amalga oshirilayotgan loyihalar bilan yaqindan tanishib, ishchi-xodimlar bilan suhbatlashdi. 

3-gidrometallurgiya zavodi – mamlakatimiz mustaqilligining dastlabki yillarida foydalanishga topshirilgan konchilik va metallurgiya sohasidagi birinchi yirik sanoat korxonasidir. 3-GMZ 1995-yil 14-iyunda foydalanishga topshirilgan. Mazkur zavod mutaxassislari olimlar bilan hamkorlikda olib borgan ilmiy tadqiqotlari natijasida 2017-yilda O‘zbekiston Respublikasi konchilik va metallurgiya sanoati tarixida ilk marotaba NKMK mutaxassislari murakkab tarkibli, qayta ishlash qiyin bo‘lgan maʼdanlardan oltin ajratib olishning yangi texnologiyasini yaratganliklari uchun Birlashgan Millatlar Tashkiloti Butunjahon intellektual mulk tashkilotining oltin medaliga sazovor bo‘lishdi. 2019-yilda zavodda chiqindilarini qayta ishlashga mo‘ljallangan filtrlash, quritish va quydirish bo‘yicha yangi yuqori texnologiyalarga asoslangan majmua ishga tushirildi. Yangi texnologik jarayonni amalga oshiradigan jihoz va uskunalar uchun kombinat va “Engineering Dobersek GmbH” kompaniyasi mutaxassislari birgalikda Germaniya davlatining xalqaro patentini qo‘lga kiritdi. Yangi loyiha tabiiy resurslardan to‘liq foydalanishni ko‘paytirish va ishlab chiqarish tannarxini pasaytirish hamda chiqindiga chiqib ketadigan oltin miqdorini ikki baravar kamayish imkonini berdi.

Umuman olganda, zavod ishga tushirilgan yilga nisbatan korxonaning maʼdan qayta ishlash bo‘yicha yillik unumdorligi 6 barobardan ko‘proq, oltinni yarim tayyor holatida ishlab chiqarish esa 5 barobar oshdi. Bugungi kunda zavodda yiliga 8 mln tonnadan ortiq “Kokpatas” va “Dovgiztov” konlaridan qazib olingan oltin tarkibli maʼdan qayta ishlanadi. 

"NKMK" AJ matbuot xizmati.